Tuesday, May 13, 2008

فى البيت

المكان : فى بيت زهرة و مريخ

الزمان: الساعة 11 بليل

العيال ناموا بعد معركة العربى و ملحمة الدراسات و انقلاب العلوم العسكرى

زهرة بتغسل المواعين و هى ساندة كوعها على الحوض عشان مش قادرة تقف

مريخ قاعد قدام التليفويون .. كرشه طالع من الفانلة ... بيقلب بين القنوات

الاول ميلودى آريبيا و بعدين هيتس و بعدين زوم

مريخ: .ايه ده؟؟.... ايه الحلاوة دى؟...... ايوة كده ... هى دى الستات ... يالله .... ربنا يرحمنا برحمته

زهرة بترفع شعرها من حوالين وشها بدراعها اللى اتبل من غسيل المواعين و بتلم الاطباق و الكوبايات اللى فاضلة عشان تغسلهم

نظرة بين زهرة و مريخ

مريخ قاعد مبوز و هم الدنيا راكبه
زهرة معكوشة و منكوشة و التعب واكل ملامحها

زهرة بتوطى تجيب كوباية من الارض و بترفع جسمها بكل بطىء: عايز حاجة قبل مانام؟

مريخ: اعمليلى شاى !!!



و الصمت ملا المكان


9 comments:

مصطفى عثمان said...

ايمان
انا ضحكت لدرجه انهم في البيت افتكروني اتهبلت
بجد جامده جدا
مسخرة
عجباني موووووت
شكرااااااااااا

Unknown said...

هههههههههههههههههه
طب كويس
انا هاخد دى على انها حاجة حلوة
شكرا يا مصطفى

Anonymous said...

برضة "أزمة حوار" ممزوجة بروتين الحياة الممل .

زواج سعيد == حوار ناجح .

Unknown said...

مش عارفة
انا حاسة المشكلة اعمق
لو الحوار موجود على قائمة الاحتمالات من الاول ماكانتش الامور هاتوصل الى هذا السوء

هنا بالفعل الاتنين متحملين المسؤلية بالتساوى
ماتقدرش تحمل طرف ذنب اللى حاصل ده لوحده

بس تفتكر يا احمد .. الحوار ده امر مسموح بيه فعلا على ارض الواقع؟؟
يعنى هل ممكن زى مالراجل يهمه ان الست تكون حلوة و متسرحة و شكلها حلو .. هل ممكن الست تقول لجوزها خس انا منظر كرشك بيقرفنى؟؟

Anonymous said...

أنا معاكي أن الموضوع أعمق من كدة .. وان دة يمكن يكون اختزال أو تسطيح لمشكلة كبيرة .. بس الحوار مهم أوي .. دى مشكلتنا كعرب أصلا .. ولا أستثني نفسي منها .. معظمنا كدة ...
الحوار تأثيره ذري فى نجاح أى علاقة .. الكلمة الطيبة بتعمل معجزات بين الناس العادية , ما بالك باتنين أصل علاقتهم ود ورحمة وسكن ?!

concerning elkarsh :
لو هو عايزها تبقي شكلها حلو ومتسرحة وحلوة , فراح قالها : "والله يا زهرة حاولي تبقي أحلي شوية انا بقرف منك وانتِ كدة" .. هل الكلمة دى هتعجبها وهتحفزها أنها تبقي أحلي .. طبعا مع مراعاة الفروق بين زهرة ومريخ واختلاف رمزية الجمال عندهم لكن لو قالتله "خس انا منظر كرشك بيقرفنى" (شفتي مشكلة حوار برضة) .. هل دة هيعمل عنده رد فعل ايجابي ؟! .. دي قرفانة منه ازاى هيستوعب انها قرفانة منه زى ماهي مش مستوعبة فوق انه قرفان منها .. .. ممكن "كلاهما" يوصلوا لبعض احساسهم بالقرف بأسلوب تاني يقربهم من بعض بدل ما يعمق بعدهم ومايحلش قرفهم من بعض

معذرة مرة تانية على التتطويل

Unknown said...

الكلمة الطيبة ليها مفعول السحر؟
الف مرة!!!
انا معاك فيها جدا

لو حطينا على جنب الكلمات المستخدمة و فرضنا جدلا ان الست اتكلمت بألطف اسلوب ممكن..هل الراجل فى اغلب الاحيان يقبل تلميحات فى موضوع زى ده؟؟
اصل الرجالة فى احيان كتير شايفين الشكل ده مش من الامور اللى لازم يحطها فى دماغه
ولا عادى يعنى لو فرضنا الاتنين اسلوبهم كويس ممكن يكون فى حوار فى النقطة دى؟

طول زى مانت عايز.. انت حاجز مدة ولا مدتين؟؟
ههههههههه

Anonymous said...

هههههههههههه .. حاجز مدتين وكل مدة بتعلقين

لو حبيين بعض , وبينهم حوار , وطريقة كلامهم هما الاتنين لطيفة وكانوا أصدقاء بجد ؛ أكيد هيقبلوا من بعض كتير .. يعني زى ما قلتي لو أسلوبهم كويس ممكن يقبلوا حوار في أي نقطة مش دي بس
.
.
.
بس دة مش بيحصل ههههههههههه ؛ فى الغالب بيبقوا واقفين لبعض زى ناقر ونقير .

من وجهة نظري المتواضعة البسيطة أعتقد أن الزيجات أربع انواع

1. ناقر ونقير
2. صمت
3. سيطرة (واحد فيهم مسيطر على التاني تماما)
4. حب وتفاهم

أعتقد أن "ناقر ونقير" و "صمت" هما أكتر وأشهر نوعين من الزيجات .. وبيتنافسوا على القمة

"سيطرة" دى مش طبيعية أصلا .. موجودة وكتيرة بس دة مش جواز دة جنان

(حب وتفاهم) أجملهم طبعا , وأكثرهم ندرة
:D

P=S=Y=C=H=O said...

دة يتسمي بمراحلة الفتور او البرود اللي بيمر بيها اي زواح و حلها هي كسر الروتين

تغير نظام الحياة ولو حتي يوم

بالنسبة لموضوع الشكل
انا مومنة تماما بان كل الرجالة عنيهم فارغة و عارفة ان في ناس كتير اووي حتقولي متتعمميش و بتاع بس هي دي الحقيقة
يبقي الرجال متجوز واحدة زي القمر و و بردة يبص علي البنات اللي في شارع
معن العكس عمرة ما بيحصل

Anonymous said...

very funny and nice posts..