Sunday, May 18, 2008

كهف الليفينج

المكان : بيت زهرة و مريخ
الزمان: بليل .. بعد يوم طويييييييل للاتنين

مريخ مرمى قدام التليفزيون و فارد رجليه .. حاطط اى قناة و مش بيتفرج اوى يعنى
زهرة داخلة تعبانة

زهرة: آخر افتكاسات المدير ابن اللاذينا .. عايزنى اعمل نص شغل سكرتيرته..امال هى الشملولة لازمتها ايه؟
مريخ( مش باصص فى اتجاه معين): آه .. المديرين كده
زهرة: لأ و ايه الهانم دى بتاخد مرتب قد كده على قاعدتها فى التكييف
مريخ: طب ماتقوليله
زهرة ( بحماس اكتر) : مانا قلتله!! قال ايه انا لازم تبقى مصلحتى على الشغل و كله للمصلحة العامة
مريخ ( عينيه نص مقفولة) : امممممم
زهرة ( و الغيظ فى عينيها) : اوحش حاجة المدير اللى يسيب الناس تطأش فى بعضيها و هو مالوش دعوة .. امال انت مدير بأمارة ايه ان شاء الله
زهرة: انت عملت ايه مع بتاع الحسابات ده؟
مريخ: عادى
زهرة: عادى يعنى ايه يعنى؟ عملت ايه؟؟ حصل ايه؟؟
---مريخ مش بيرد----
زهرة: انت فى ايه؟؟ مش بترد عليا ليه؟
مريخ: مانا برد اهه
زهرة: امال يعنى اروح اكلم الجيران
مريخ ( خلاص بيجعر): ياااااااااااا زهرة ... يااااااااااازهرة ... عشرين الف مليون مرة قلتلك انا باجى اخر اليوم انبوبتى بتفضى .. ارحمى اهلى ... يا ساتر
زهرة (بتصرخ): يعنى ايه يعنى؟ امال انا اتجوزت ليه؟
زهرة ( طبعا بتعيط): انت مش بتتكلم معايا خالص .. انا مش عارفة مالك
مريخ ( هيرمى نفسه من البلكونة) : يا ستى نتكلم .. بس مش وانا ليسة جاى من برا
زهرة: مانا ليسة جاية انا كمان .. و من الشغل برضه..بس انا جاية جرى عايزة احكيلك اللى حصل كله كده و تحكيلى .. مشاركة يا بنى آدم
مريخ: ماشى يا ستى نتشارك .. بس مش الساعة ستين بليل .........الرحمة حلوة
زهرة ( بمنتهى الاحساس بالقهرة): رحمة؟؟؟!!!! ...لأ..انا هارحمك خالص يعنى

زهرة مشيت للأودة و رزعت الباب

تمت

Tuesday, May 13, 2008

فى البيت

المكان : فى بيت زهرة و مريخ

الزمان: الساعة 11 بليل

العيال ناموا بعد معركة العربى و ملحمة الدراسات و انقلاب العلوم العسكرى

زهرة بتغسل المواعين و هى ساندة كوعها على الحوض عشان مش قادرة تقف

مريخ قاعد قدام التليفويون .. كرشه طالع من الفانلة ... بيقلب بين القنوات

الاول ميلودى آريبيا و بعدين هيتس و بعدين زوم

مريخ: .ايه ده؟؟.... ايه الحلاوة دى؟...... ايوة كده ... هى دى الستات ... يالله .... ربنا يرحمنا برحمته

زهرة بترفع شعرها من حوالين وشها بدراعها اللى اتبل من غسيل المواعين و بتلم الاطباق و الكوبايات اللى فاضلة عشان تغسلهم

نظرة بين زهرة و مريخ

مريخ قاعد مبوز و هم الدنيا راكبه
زهرة معكوشة و منكوشة و التعب واكل ملامحها

زهرة بتوطى تجيب كوباية من الارض و بترفع جسمها بكل بطىء: عايز حاجة قبل مانام؟

مريخ: اعمليلى شاى !!!



و الصمت ملا المكان


Friday, May 9, 2008

Date الأولى

المكان: مكان لطيف فى مصر
الزمان: ساعة صفا فى اى يوم

زهرة و مريخ خارجين سوا

مريخ: هتاخدى ايه؟
زهرة: مش عارفة .. الفراخ شكلها ظريف
بعد شوية و هما بياكلوا

زهرة: الاكل حلو و انا كنت جعانة
مريخ: طب كويس
زهرة: انا عطشت ... استنى كده .. لو سم...
مريخ تبريقة شريرة فى عينيه : ايه اللى انتى بتعمليه ده؟
زهرة يا عينى مش فاهمة: فى ايه؟
مريخ: انتى قاعدة مع جردل؟؟
زهرة: ايه يا مريخ فى ايه - البت اتخضت فعلا-
مريخ: ازاى تنادى الراجل و انا قاعد معاكى يعنى؟
زهرة: يا سلااااااام... و فيها ايه دى؟ عايزة اشرب , قلت اناديه يجيبلى حاجة اشربها
مريخ: تقوليلى و انا انديهولك
زهرة: ليه ان شاء الله.. و انا ناقصة لسان؟
مريخ: ماتتعوديش تجادلى فى كل حاجة كده
زهرة: طب فهمنى طيب
مريخ: يييييييييييى يا زهرة.. انتى هايجرالك ايه طيب اما تريحينى فى حاجة زى دى؟ هايخس عليكى ايه؟
زهرة: طب مانا طول عمرى باقول على اللى انا عايزاه
مريخ: ده قبل الوضع الحالى
زهرة: يعنى لو صحاب اكلم الرجالة قشطة لكن لو مخطوبين انت تكلمهم بلسانى؟
مريخ: زهرة .. بلاش الطريقة دى
زهرة: طريقة ايه يا مريخ .. انت مش شايف بتقول ايه؟
مريخ: اشمعنا ماقولتيش كده اما فتحتلك باب العربية ؟ لأ و انبسطتى اوى؟
زهرة: ايوة ده دلع... فى فرق بين انك تدلعنى و انك عايز تكلم الرجالة بلسانى
مريخ: ماهو اللى هواكى هيبقى دلع و اللى مش عاجبك هايبقى كتمة


اتضربDateال

Thursday, May 8, 2008

تقديم

بصوا بقى ... الاول كده لازم تعرفوا الحدوتة
زمان ..زيى زاى ناس كتير ... قريت كتاب "الرجال من المريخ و النساء من الزهرة" . و فى معرض الكتاب اللى فات لقيت طبعة جديدة من السلسلة و بدأت اقراه تانى.

الرجل جون جراى ده فعلا عنده حق .. بس ساعات كنت بحس الامثلة مش راكبة علينا او التطبيقات مش دقيقة
قلت بس .. انا هاحكى حكاية زهرة و مريخ ( النسخية المصرية لجيل الالفية ) - حتة اسم - ههههههه

فى الاول خالص فكرت ان زهرة و مريخ يبقوا شخصيتين ثابتين ... بس لقيت ان عشان شخصية مريخ تبقى موضوعية لازم يبنيها راجل... فقلت لنفسى و ليه لأة؟

بدأت رحلة البحث فى كل اللى اعرفهم و اللى ماعرفهمش عن حد يتولى شخصية مريخ
انا اكتب زهرة
و هو يكتب مريخ
و كان مطلوب فيه المواصفات الآتية:

1- يهوى الكتابة
2- مهتم و له وجهة نظر فى حوار الرجالة و الستات
3- فى الفئة العمرية من 25 الى 30 عشان من سنى لضمان ان الاختلاف الوحيد يكون فى كونه راجل و كونى ست و مايكونش السن عامل بعد فكرى
4- دماغه ماتكونش اللى هو بايظة اوى عشان نعرف نتفاهم و برضه مش الوهم عشان تتوجد الخلافات اللى نقدر نشارك الناس فيها
و قلت بس .. انا الاقيه و بعدين نبدأ نروح كل حتة و نتكلم فى كل حاجة و نسجل الحواديت دى

بعدين قلت لروحى طب ماهو لو الشخص المعجزة ده كان اصلا موجود ماكانش هايبقى فى مشاكل تانية كتير ...ههههههههه

فخلاص ... هنمشيها زهرة و مريخ من عندى انا ... حتى كده هاتكون اثرى لانها بتتكلم عن كذا زهرة و عن اكتر من مريخ

بس فى حاجة ... انا هاقول الكلام المريخى زى ماهو .. حتى لو بان كلام عجيب و غير منطقى
ماهو ان شاء الله اما نتكلم و نقرا و نكتب مريخى و هم يتكلموا و يسمعوا زهرى ... جايز ... جايز نفهم اى حاجة

و مش عايزة حد من معشر آل مريخ ييجى يقوللى مفيش الكلام ولا احنا مش بنعمل كده.. انا مريخ مش هايبقى من نسج خيالى.. كل مرة هايكون مريخ انا شفته او سمعته

و عايزاكم كل مرة انتوا اللى تقولولى ممكن يكون فين الحل بين رزة و ميخا