Friday, May 9, 2008

Date الأولى

المكان: مكان لطيف فى مصر
الزمان: ساعة صفا فى اى يوم

زهرة و مريخ خارجين سوا

مريخ: هتاخدى ايه؟
زهرة: مش عارفة .. الفراخ شكلها ظريف
بعد شوية و هما بياكلوا

زهرة: الاكل حلو و انا كنت جعانة
مريخ: طب كويس
زهرة: انا عطشت ... استنى كده .. لو سم...
مريخ تبريقة شريرة فى عينيه : ايه اللى انتى بتعمليه ده؟
زهرة يا عينى مش فاهمة: فى ايه؟
مريخ: انتى قاعدة مع جردل؟؟
زهرة: ايه يا مريخ فى ايه - البت اتخضت فعلا-
مريخ: ازاى تنادى الراجل و انا قاعد معاكى يعنى؟
زهرة: يا سلااااااام... و فيها ايه دى؟ عايزة اشرب , قلت اناديه يجيبلى حاجة اشربها
مريخ: تقوليلى و انا انديهولك
زهرة: ليه ان شاء الله.. و انا ناقصة لسان؟
مريخ: ماتتعوديش تجادلى فى كل حاجة كده
زهرة: طب فهمنى طيب
مريخ: يييييييييييى يا زهرة.. انتى هايجرالك ايه طيب اما تريحينى فى حاجة زى دى؟ هايخس عليكى ايه؟
زهرة: طب مانا طول عمرى باقول على اللى انا عايزاه
مريخ: ده قبل الوضع الحالى
زهرة: يعنى لو صحاب اكلم الرجالة قشطة لكن لو مخطوبين انت تكلمهم بلسانى؟
مريخ: زهرة .. بلاش الطريقة دى
زهرة: طريقة ايه يا مريخ .. انت مش شايف بتقول ايه؟
مريخ: اشمعنا ماقولتيش كده اما فتحتلك باب العربية ؟ لأ و انبسطتى اوى؟
زهرة: ايوة ده دلع... فى فرق بين انك تدلعنى و انك عايز تكلم الرجالة بلسانى
مريخ: ماهو اللى هواكى هيبقى دلع و اللى مش عاجبك هايبقى كتمة


اتضربDateال

9 comments:

Anonymous said...

أولاً اسمحيلي أحييكي على المدونة الجديدة و من أولها مبشرة بكل النجاح إن شاء الله ...
أنا فعلاً أوافقك الرأي في حاجات في كتاب جون جراي لا تنطبق على مريخ إلي عندنا و إنت فاهمة قصدي .

أنا فعلاً كان نفسي في نسخة شرقية ...
أما المطب الاول فعلاً موجود و يا ريت مايجيش مريخ منهم يقول لا ..
هما فعلاً كثير من الرجاله بتتغير و تعمل ذي الأخ. أول ما يبقى الخطيب
إسماعيل بيه ... يتحكم فيها و عاوز يقفل عليها في زجاجة ....داء التملك
العروسة إللي ماما إشترتها له ...

جميلة جداً و مشوقة مستنية مريخ ها يعمل إيه ؟

Fantasia said...

ألف مبروك ع المدونة يا إيمان
أتمنى لكي كل التوفيق

بداية جميلة ولذيذة وبتثير موضوع هام
محاولات فرض السيطرة الذكورية بتتكرس من خلال مواقف وتصرفات صغيرة, زي اللي انتي عبرتي عنها في المشهد القصير ده
وفكرة ان الذوق والاتيكيت هما حاجة الراجل بيتفضل ويمن بيها ع الست وهو متوقع ان المقابل يكون سيطرته الكاملة عليها وامتلاكها من غير أي مقاومة من ناحيتها

شوقتيني للي جاي

خالص تحياتي

مصطفى عثمان said...

ايمان
قريت المدونه الجميله و الجديده دي
رهيبه مسخرة زي ما بيقولوا
و عايز اقولك ان ميخا بيعمل اكتر من كده
لان بصراحه رغم اني راجل
بس معظمهم عايز الحرق
لان طريقة تفكيرهم في معظم الاحيان غريبه و مجنونه
و عايزين يسيطروا على الست بجميع الاشكال
مبروك على مدونتك الجديده
اللي هتابعها ان شاء الله
شكراااااا

Unknown said...

شكرا للتهانى و للدعم من الاول

انا كمان مستية مريخ يا ولاء

فانتازيا:
اهلا بيكى يا جميلة..انا ماعرفكيش بشكل شخصى بس مدوناتك فيها كلام اكتر من رائع
المأساة كمان ان فى بنات بترضى و بعد ما تعملها مرة و اتنين تبدأ الخناقات
هو متخيل انه بقى خلاص حق مكتسب.. و هى شابفة انها مش قادرة تكمل

مصطفى:
الكلام ده منك مش عايزة اقولك مهم ازاى
ان ليسة فى حد بيفكر على الاقل
اهلا بيك
خليك بس هنا و هاتشوف ميخا و رزة و جنانهم!!
ههههههه

Anonymous said...

Keep going, it's really a great idea eastern-izing the book, which is great on its own. Suggestion: make a face book group "Eastern Venus and Mars" or so, and I will be a very active, maybe proactive when I have time, member. :) Good job

Anonymous said...

مممممممممممم .. أزمة حوار .. مش مهم المشكلة ايه بس دي أزمة حوار .. فى الاغلب زهرة متضايقة من أسلوبه وطريقة كلامه وزغرة عينه والتلويح بالتجعير فى أي لحظة أكتر ماهي متضايقة من الحاجة نفسها اللي هو بيتكلم فيها ومضايقاه .. يمكن لو كان رفيق شوية كان زهرة بقة ليها رد فعل مختلف .. أكيد كان هيبقي مختلف ..
*أنا مش بتكلم عن المشكلة نفسها انها تنادي الراجل أو لأ*

Unknown said...

يعنى
على الرغم من ان فى الموقف ده بالذات انا ضد المحتوى لكن ممكن اتقف معاك ان حدة الموقف كان ممكن تقل اوى لو اسلوبه اتغير

Unknown said...

احمد فتحى:

اهلا اهلا اهلا
و ادينا بنحاول نعمل حاجة يمكن ناخد ثواب فى الناس
ههههههههه

P=S=Y=C=H=O said...

w mish bas el date endarab dol 7ayfdal met7'n2een esbo3 ba3edha masln..
nice awi ya eman