Sunday, May 18, 2008

كهف الليفينج

المكان : بيت زهرة و مريخ
الزمان: بليل .. بعد يوم طويييييييل للاتنين

مريخ مرمى قدام التليفزيون و فارد رجليه .. حاطط اى قناة و مش بيتفرج اوى يعنى
زهرة داخلة تعبانة

زهرة: آخر افتكاسات المدير ابن اللاذينا .. عايزنى اعمل نص شغل سكرتيرته..امال هى الشملولة لازمتها ايه؟
مريخ( مش باصص فى اتجاه معين): آه .. المديرين كده
زهرة: لأ و ايه الهانم دى بتاخد مرتب قد كده على قاعدتها فى التكييف
مريخ: طب ماتقوليله
زهرة ( بحماس اكتر) : مانا قلتله!! قال ايه انا لازم تبقى مصلحتى على الشغل و كله للمصلحة العامة
مريخ ( عينيه نص مقفولة) : امممممم
زهرة ( و الغيظ فى عينيها) : اوحش حاجة المدير اللى يسيب الناس تطأش فى بعضيها و هو مالوش دعوة .. امال انت مدير بأمارة ايه ان شاء الله
زهرة: انت عملت ايه مع بتاع الحسابات ده؟
مريخ: عادى
زهرة: عادى يعنى ايه يعنى؟ عملت ايه؟؟ حصل ايه؟؟
---مريخ مش بيرد----
زهرة: انت فى ايه؟؟ مش بترد عليا ليه؟
مريخ: مانا برد اهه
زهرة: امال يعنى اروح اكلم الجيران
مريخ ( خلاص بيجعر): ياااااااااااا زهرة ... يااااااااااازهرة ... عشرين الف مليون مرة قلتلك انا باجى اخر اليوم انبوبتى بتفضى .. ارحمى اهلى ... يا ساتر
زهرة (بتصرخ): يعنى ايه يعنى؟ امال انا اتجوزت ليه؟
زهرة ( طبعا بتعيط): انت مش بتتكلم معايا خالص .. انا مش عارفة مالك
مريخ ( هيرمى نفسه من البلكونة) : يا ستى نتكلم .. بس مش وانا ليسة جاى من برا
زهرة: مانا ليسة جاية انا كمان .. و من الشغل برضه..بس انا جاية جرى عايزة احكيلك اللى حصل كله كده و تحكيلى .. مشاركة يا بنى آدم
مريخ: ماشى يا ستى نتشارك .. بس مش الساعة ستين بليل .........الرحمة حلوة
زهرة ( بمنتهى الاحساس بالقهرة): رحمة؟؟؟!!!! ...لأ..انا هارحمك خالص يعنى

زهرة مشيت للأودة و رزعت الباب

تمت

16 comments:

مصطفى عثمان said...

ايمان
كالعاده ملهاش حل
انا بقيت استني البوست الجديد عشان اضحك
رهيبه
جميله جدااااااااااا
شكرااااااااا

Anonymous said...

دى أكتر حاجة اتكلم عنها (جون جراى) .. أهمية الحوار أو المشاركة والانصات .

المشكلة فيهم هما الاتنين .. هو مش قادر يفهم أهمية الانصات للزوجة وهي مااختارتش الوقت المناسب .. بس أقولك الحق .. المشكلة عند مريخ أكتر

Unknown said...

ليه يا احمد؟
بجد انا نفسى اعرف

Anonymous said...

يمكن عشان مريخ مش بيعرف يفصل بجد .. أرفع قبعتي لمريخي يتقن كيف (يفصل) بكل سلاسة .. انه يفصل عن الهموم ووجع الدماغ أول ما يدخل بيته , واللي بييجي مُحمل بيهم جاهز من الغابة وحروب الشوراع ...
أو يمكن هو فعلا مش عارف أهمية الانصات عند الزوجة وانها بتقتات بالانصات وبتعيش بيه وبتوصل عند بعضهن انه أهم من الهواء وأهم من كل حاجة .. أويمكن عارف ومش فارقة معاه .. أو يمكن بطل يحبها .. أو يمكن جاله ملل , ببساطة جاله ملل ...
أو ممكن زى ما بيقول (جون جراي) انه حزام اتشد ولازم هجييله وقت ويرخي وكل ماتشده أكتر ناحيتها يبقي هو عايز يرجع تاني ويرخي لورا وانها فروق بينهم كمريخي وكزهرية ويمكن لو عرفوها وصمموا على امتصاص الفروق دى يبقي الحال مختلف .

مريخ ندل أوي وبينسي بسرعة .. يقعد يقول هاعمل وهاعمل وهاحبها وهاحترمها هاحتضنها وهانصت ليها عالطول لكن مع مرور الوقت بينسي عهده سواء عهده لنفسه أو عهده ليها .. مريخ عنده جنون عظمة -إلا من رحم ربي- شئنا أم أبينا عنده جنون عظمة بيتشكل فى صور مختلفة وبيختفي ورا قناعات متعددة .. وزهرة لما بتغضب عليه بسبب أفعاله أو بسبب نزولها لبئر الاكتئاب من وقت للتاني بتنسي خااااااالص انه عنده جنون عظمة ممزوج بمتناقضات وانه صعب أوي يتعالج منه وتبدأ تتضرب كام كلمة مع كام فعل يبوظوا الدنيا ويزودوا الطين بلة

فيه نقطة تانية .. يمكن عشان كتير أوى الزوجة أو الست فى حياة الراجل بتبقي رد فعل لأفعاله .. سوري , جملة مستفزة جدا بس واقعية لحد كبير .. يعني تزعل بزعله .. تسكت بسكوته .. تفرح بفرحه -لو كانت عايزة تفرح- .. وبالتالي أى مشكلة بتحصل منهم فى الغالب بيكون سببها مريخ لأنه "فعله" كان سبب"رد فعلها" .

ثواني , هل معني كدة أن زهرة غلبانة على طول الخط ؟! .. ياريت .. كان ساعتها الحل طلع في وشنا وهو بيبتسم بكل ثقة .. كنا هنقول لمريخ المشكلة فيك انت وحدك يا مريخ والحل فى ايديك أنت .. لكن للأسف كتير زهرة بتبقي مريخية ومريخ بيبقي زهري ...
بس اللي متأكد منه ان جزء كبير من الحل عند مريخ وأنه ممكن يعمل كتير فى سبيل أنه يخلي علاقته بزهرة علاقة سعيدة مستمرة ويبقي على الأقل عمل اللي عليه قدام نفسه

الاحتمالات متعددة بتعدد الزيجات على وجه الأرض لأن كل زيجة حالة متفردة فى ذاتها .. يمكن بينهم عوامل وأسباب ونتائج مشتركة كتير بس كل حالة متفردة على أى حال

معذرة على التتطويل دة كله .. هاعملك ايه !! .. تدويناتك حلوة وملهمة بجد

Unknown said...

ايه الكلام الكبير الجامد ده يا احمد
انا عايزة اسقف .. هههههه

بص يا سيدى..انا هانفق معاك كده فى الازل ان الاتنين بيطلعوا من درس مريخ و زهرة زى ماهم ..من غير ما يستفيدوا كلمة واحدة
لاهى عندها اى احتمال انها تسيبه حبة يفوق و هو بيفتكر انها الكلام كده ده اهم حاجة عندها فى التواصل الانسانى ككل مش بس مع الزوج

و كتير مع قصر الوقت - الساعة كانت خلاص 11- مش بيبقى فى مساحة من الوقت عشان الاتنين يرتاحوا
لكن اعتقد لو فى من الاول حسن نية و محاولة جادة فى فهم الامرو دى جايز الدنيا تبقى اهدى شوية
اللى هو كل شوية حد ييجى على نفسه مرة


اما عن ندالة و انانية مريخ..فانا مش عارفة اقول ايه بعد كلامك الرائع ده ..
زهرة طبعا مش غالبانة
لانها عليها مسؤلية برضه من الاول
لاحظ ان فى اغلب الاحيان مريخ - لجنون العظمة اللى عنده - مش بيشوف اى حاجة فيه تستدعى التحليل او التنقيح و كمان بيقابل وعود من زهرة انها ستتحمل الجنون ده.. و لان الدنيا بتفاصيلها الصغيرة كفيلة انها تظهر الحقائق بيبان اوى مدى عدم قدرة زهرة على الوعود اللى هى وعدتها هنا

فعلى الرغم من ان مريخ ممكن يكون انانى او مجنون بس برضه انا قدام زهرة فى احيان كتير كانت شايفة ده من الاول و فاكرة نفسها هاتعرف تتأقلم معاه

انت اللى كلامك هايخلى المدونة ثرية
احسن حاجة اللى بيحصل ده
ان الواحد يسمع من الناحيتين
بجد ده ثرى جدا

P=S=Y=C=H=O said...

loooool
w heya di el drama eli 3ayesheen feha eli metgwzeeen

شهيدة said...

سلام

اولا انا من الناس اللي قروا الرجال من المريخ والنساء من الزهرة... الكتاب عجبني جدا جدا وبهرني كيف ان كل شيء يقال فيه صحيح تقريبا
احسست انه حين تحدث عن الزهريات تحدث عني انا

بس المشكلة اني حاولت كتير اخلي خطيبي يقراه... لكن هو ده حال المريخيين ما بيحبوش نوع الكتب دي ، ده لو كانوا بيحبو القراية من الأصل :)

فكرتك جميلة جدا
وبالفعل الأمثلة كانت نقطة الضعف الوحيدة في الكتاب
واننا نقرب الفكرة بأمثلة من عندنا حاجة جميلة ومهمة

ححاول اتابع قصصك كلها ان شاء الله

بالتوفيق
تحياتي

77Math. said...

اتأخرتِ كثير كدا ..

عايزين نقرأ لك

Unknown said...

الامتحانات هى اللى حايشانى
اخلص بس ان شاء الله و هانشوووووووف

Miso soup said...

هاهاهاها ... و الله الاتنين مساكين

Miso soup said...

شهيدة... علي فكرة انا من المريخ اهو و مع ذلك قريت الكتاب و اكتر منه كمان ... المريخيين ممكن يكونوا بيحبوا الكتب ده برده .... بلاش تعميم و تحيزات مسبقة

Unknown said...

تحيز مسبق؟
مش فاهمة .. اللى اتفهم من البوست ده ان انا عندى تحيز مسبق ضد اهل المريخ؟؟؟
و ان انا باقول انهم - اهل المريخ - مش بيحبوا الكتاب ده؟؟
اتفهم من كلامى كده؟؟

Miso soup said...

لا يا ايمان انا اقصد تعليق شهيدة مش البوست بتاعك .... لاحظي اني كتبت التعليق علي تعليقها (بعد اذنك طبعا) لوحده و كمان كتبت اسمها الاول
علي العكس كلامك في البوست متوازن ... تحياتي

Unknown said...

اه فهمت
لا طبعا علق براحتك
طالما ان كلنا هدفنا هو المشاركة و التفاعل فى ظل احترامنا لبعضينا يبقى ليه لا
اكيد كلنا هانستفيد

وردة فرح said...

استمتعت بالقراءة ... :)
شكرا عالبوست ...
و الحياة تفاهم ! وكلمة حلوة ... ^_*
و في مثل يقول: كلمة تحنن وكلمة تجنن ...
مريخ و زهرة لازم يفهمون هالشي ...

عالعموم بوست حلوو ...
و تيك كير ... ^_*

Unknown said...


thx

كشف تسربات المياة
غسيل خزانات
شركة نظافة عامة